MSU-in PWD Commissioner rawih nawn duh lo

Mizo Students Union (MSU) chuan Commissioner, Persons With Disabilities (PWD) atana B. Sairengpuii kum hnih danga atana rawih nawn leh tura sawrkar thuchhuak (order) chu an hriatthiam theih tawh loh thu an sawi.

MSU chuan induhsakna hleihluak taka a ngaih avang leh rualbanlote enkawl tura special bik a nihna pawh an hriat loh thu sawiin, engti kawng maha chhawr zui chi ni tawh lohvah an ngai tih an sawi a. Kumin December, 2015 hma ngeia Commissioner, PWD atana rawih nawn lehna order chu sut leha mithiam leh țha, thinlung leh duhsak taka rualbanlote tana hma la ngam tur dah turin MSU chuan Mizoram sawrkar a phut tih an sawi a. An thil phut a hlawhtling lo a nih chuan rualbanlote leh Mizo mipuite tan a hna atanga ban ngei theih nan hma an la dawn tih an sawi.

Nimin khan MJA office-ah Press mite kawmin MSU President PC Lalrinhlua chuan sawrkar hnathawk pension hun tawh pawhsei leh rawih nawn awm fo țhin chu țha an tih loh thu a sawi a. Sawrkar kan lo hrawn tawhte hnenah pawh an duh loh thu an thlen zing hle niin a sawi a. Sawrkarin a mamawh bik leh an tel lova sawrkar a kal thei dawn lo te a nih ngawt loh chuan rawih nawn leh hun pawh seisak chu awm tawh lo se an duhdan a nih thu an sawi.

MSU hruaitute chuan B. Sairengpuii hi Mizoram sawrkar hian kum thum chhung a lo ruai nawn tawh (2012-2013, 2013-2015) tih an sawi a. Tunah pawh kum hnih dang (2015-2017) atana rawih nawn a ni leh zel chu MSU chuan hriatthiam theih lohah an ngai tih an sawi bawk.