UPSC civil service exam kalhmang ennawntu tur din

ZORAM TODAY | October 6-19 October, 2015
Sawrkar laipui chuan UPSC civil service thenkhat IAS, IPS officers laknaa an exam kalhmang ennawntu tur expert committee a din a, Chhattisgarh IAS officer B.S Baswan chuan he committee hi a ho dawn a, committee member-ah hian academician, technocrat leh bureaucrat senior tak tak an tel dawn bawk.

He committee hian civil service examination atana kum bithliah te, thiamna bituk te, syllabus leh exam kalhmang (pattern) a enfiah dawn a, he committee report zulzuiin sawrkar laipui chuan kum tina exam an buatsaihnaa stage pathum paltlang ngai awm — preliminary, main leh interview kalhmang siam that a ni ang.

Ram chhung hmun hrang hrang atanga UPSC civil service exam kalhmang leh syllabus sawiselna a nasat avang leh, mathematics leh engineering lama hnuhma neite tana samlam (advantage) a tam bik avangin, mipui ngenna angin sawrkar laipui chuan he committee hi a din ta a ni.