Oscar award atan Marathi film ‘Court’ thlang

ZORAM TODAY | October 6-19 October, 2015
Marathi film ‘Court’ chu 88th Academy Awards 2016 (Oscars Award) tia hriat lar)-a Best Foreign Language category-a thlan theih tur India aiawh turin thlan a ni.

Film siamtu lar Amol Palekar kaihhruai Film Federation of India (FFI) chuan Oscar Award-a India aiawh thei turin film 30 a chhawp chhuak a, chung zingah ‘Court’ hi a thlang ta a ni. ‘Court’ hi Marathi film zinga Oscar award atana India official entry pathumna a ni a; tun hmain Marathi film dang ‘Shwass‘ chu kum 2004-ah thlan niin ‘Harishchandrachi Factory’ chu kum 2008 khan Oscar Award Best Foreign Language-a India aiawh tura chhawp chhuah a lo ni tawh bawk.

He film hi India legal system tarlanna a ni a, India legal system tha lo hailanna a nih avangin mipui lawm a hlawh hle.  Chaitanya Tamhane film direct hmasak ber niin, a story pawh ama ziah a ni a; Vivek Gomber chhuah (produce) niin Vira Sathidar, Vivek Gomber, Geetanjali Kulkarni, adt. te’n an chang a ni.

Kuminah hian he film hian 62nd National Film Awards-ah Best Feature Film award a dawng a, tun thleng hian film festival hrang hrang — Vienna, Atalya, Mumbai leh Singapore-ah te award 18 ngawt a lo dawng tawh bawk.