Maharashtra sawrkarin Nagpur-Mumbai expressway a siam dawn

Maharashtra sawrkar chuan kilometre 800-a sei tur, Nagpur-Mumbai expressway siam a nih tur thu a puang. He kawngpui hi ‘Communication Super-expressway’ tih hming emaw, ‘Nagpur-Amravati-Aurangabad-Ghoti-Mumbai expressway’ tih hming a pu dawn a ni.
He project hi kum 5 chhunga zawh tur niin cheng vaibelchhe 30,000 ngawt ruahman a ni hem mai! A kawng hi  six lane-a siam a ni dawn a, a thawh khatnaah chuan four lane-a siam tan a ni dawn a ni. Kawngpui tluanin CCTV camera dah tum a nih bakah wifi hman theih tura duan a ni a; optical fibre zamin kawng hrula Information Technology (IT) park leh khawpui awmte changtlung zawka siam tura ruahmanna siam a ni bawk.
Nagpur-Mumbai expressway hi Maharashtra hmar lam khaw thenkhat, rethei tak takte tihhmasawn nan a tangkai hle dawn a, tun hmaa Nagpur leh Mumbai inkar tlàn nana darkar 14 hun an hman thin chu, kawngpui tharah chuan darkar 10 chhungin an thleng zung zung thei tawh dawn a ni. Maharashtra sawrkar hian inkalpawhna kawng a ngai pawimawh chho thar a, chhak leh thlang, chhim leh hmara khawpui hrang hrang inkalpawhna tha zawk neih tumin hma a la nasa hle.