Aizawl North-III-ah BIG-III inkhel a chhuak dawn!

ZORAM TODAY | November 17-30, 2015

Tunlai Zoram politics titi chu AMC inthlan, Aizawl North-III Assembly by-election leh LADC inthlante hi a ni âwm e. Party tinte’n theihtawp an chhuah mek a, politics thu lengvak pawh ngaihnawm tham tak a ni.

Aizawl North-III Assembly constituency hi eptu party-te’n chhan hrang hranga an puh avangin, a bialtu MLA, Health Minister ni bawk Lal Thanzara’n a bansan a. A hmun ruak luah tur zawnna by-election chu November ni 21, 2015-ah neih a ni dawn a ni.

Candidate tur hi Mizoram Pradesh Congress Committee (MPCC)-in puang hmasa berin October ni 26, 2015 khan MPCC vice president R. Lalzirliana chuan Congress Bhavan-ah a puang a, minister bang ta, Lal Thanzara an vawrh chhuak leh dawn a ni.  INC hi Mizoram Peoples’ Conference (MPC)-in an pui ang.

Mizo National Front official candidate hi October ni 30, 2015 khan MNF president Zoramthanga chuan Mizo Hnam Run-ah a puang a, MNF Thalai president ni lai K. Vanlalvena an vawrh chhuak a; anni party hi an maldin dawn a ni.

Aizawl North-III by-election, AMC leh LADC inthlanah Zoram Nationalist Party (ZNP) leh BJP chu National Democratic Alliance (NDA) tiin an thawkho dawn a, by-election atana an candidate tur hi November ni 4, 2015 khan ZNP office-ah puangin ZNP president Lalduhoma’n a chuh ang. Tihian Aizawl North-III Assembly by-election chu thuang thumin an inchuh dawn ta a ni.

He bial hi state kan nih hnua inthlan hmasak ber atang tawhin bial ngaihnawm tak a ni a, INC leh MNF intlin chhawk zak zakna bial a ni thin. Kum 1987 MLA election-a MNF-in sawrkarna an lak tum khan, Saingura Sailo (MNF), H. Thansanga (INC), Lalkhawliana (PC) leh Zosiamliana (MNU) te’n an inchuh a, MNF candidate Saingura Sailo-in vote 2268 hmuin vote 356 lekin INC candidate H. Thansanga a hneh a ni.

Kum 1989 MLA election-ah J. Lalsangzuala (INC), Lalkhawliana (PC), Aichhinga (MNF) leh Rochhunga (MNU) te’n inchuh lehin, INC candidate J. Lalsangzuala thlan tlin a ni a, vote 496 chauhvin hnehna a chang thei a ni. Kum 1993 MLA election-ah pawh chak lehin, MNF candidate Lalkhawliana chu vote 296 lekin a hneh leh bawk.

Kum 1998 MLA election-a MNF leh MPC tangkawpin sawrkarna an siam tum khan he bialah MPC president Lalhmingthanga a tling a, amah hneih bertu Rochhunga Ralte (INC) chu vote 2678 ngawtin a hneh a, independent candidate a awm bakah BJP-in candidate an nei tan ve bawk.

Kum 2003 MLA election-ah khan MNF-in sawrkarna an siam a, MNF palian berte zinga mi, K. Sangthuama chu thlan tlin niin amah hnaih bertu Zairemthanga (MPC) nen vote 59 chauhvin an inthlau va, INC candidate F. Lalremsiama nena an inthlauhna hi vote 306 a ni bawk a; inthlan ngaihnawm tak a tling.

Kum 2008 MLA election-ah MNF sawrkar chu tluin he bial hi INC kutah a awm leh ta a. Khata MLA an thlan tlin chu Lal Thanzara hi a ni. Amah hnaih bertu chu MLA ni lai K. Sangthuama niin, MNF MLA tlak runpui ni mah se vote 506 chauhvin a hneh a. ZNP leh MPC tangho candidate chu tuna he area-a INC AMC candidate Rosiamngheta niin vote 637-in Lal Thanzara a hneh lo a ni.

MLA inthlan hnuhnung ber, kum 2013 khan Lal Thanzara bawk hian vote 6262 hmuin amah hnaih bertu MNF/MPC candidate Lalchhandama Ralte chuan vote 5512 a hmu a, an inthlauhna chu vote 750 chauhvin an inthlau va, ZNP candidate RK Daniala pawhin vote 1878 a hmu bawk.

MPCC candidate Lal Thanzara

Mizoram hi state puitlinga kan inhlankai hnuah MLA election vawi 7 neih a ni tawh a, Aizawl North-III bial (tun hmaa Aizawl East-I)-ah hian MNF chu tum 3 (tum khat thawhhona) chakin INC vawi 4 an chak tawh bawk. Candidate-te inhnehtawk em emna bial a ni a, kum 1998-a MNF/MPC candidate-a Lalhmingthanga vote hmuh teuh bak kha chu, vote 1000 chuanga chak an la awm lo.

Lal Thanzara hi Zarkawt veng pa a ni a; K. Vanlalvena hi Bawngkawn veng niin Lalduhoma hi Chawlhhmun veng a ni. Lal Thanzara MLA/Minister atanga a ban chhan hi MNF Thalai president K. Vanlalvena vang tih loh theih a ni lo vang a, tuna by-election-a an inhmachhawn leh tur hi mipuite nghahhlelh tak pakhat a ni.

MNF candidate K. Vanlalvena

By-election hi sawrkar lai party chana ngaih a ni tlangpui a; chutih rualin tuna by-election lo awm turah erawh sawrkar lai pawhin thapui tak meuh meuh an thawh niin a lang. MNF party lam hian Lal Thanzara hi an la um zui zel a, Lal Thanzara hian public speech a neih remchang apiang chu policy/manifesto tlangaupuina chance pawh nei mang lovin insawifiah nan hun a hmang hnem hle a, hei hi a chhiatpui pha ang em, tih zawhna a piantir a. Chu bakah, kohhran mipuite’n an dodal nasa em em chung pawh Mizoram sawrkarin zu a zawrh hnua inthlan awm hmasa ber tur a ni a, zo do kohhran hi zu zuar party lo lamah an tlu dual ang em, tih zawhna a awmtir thei. Chutih rualin, inthlan hnuhnung bera vote 1000 chuang zet hmutu ZNP candidate RK Daniala chu a campaigner a ni chho va, kum 1998 inthlana he biala vote hmu hnem em emtu MPC party-in an pui dawn bawk nen, ngaihthatna tham a ni thei tho bawk ang.

Hetih lai hian NDA candidate, ZNP president Lalduhoma chuan DDK anchor J. Malsawmzuala zawhna chhangin, risk a sàn thu leh a tlin theihna chance a tlem thu te, Pathian chaknaa a innghah thu a sawi bawk. A sawi ang hian, inthlan hnuhnung bera bial hniha hnawl tawh ZNP president hi tlin tura rin kai ber a ni lo va, mipui mitah K. Vanlalvena leh Lal Thanzara te pahnih an fu thup zawk niin a lang.

November ni 13, 2015 zan khan Mizoram People’s Forum (MPF) buatsaihin Chanmari YMA Hall-ah candidate pathumte pualin vantlang inkhawm buatsaih niin LPS channel chuan live-in an pe chhuak a, hei hi candidate pathumte mipui hmaa an inlanhona hmasa ber a ni. He hunah hian Sunshine Overseas company atanga Lal Thanzara’n share a neih leh neih loh chungchang bawk chu a langsar ber a ni.

November ni 14, 2015 zanah Doordarshan Kendra (DDK)-in candidate pathumte a mal mala an kawmna an tichhuak a, hetah hian Lal Thanzara chuan insawifiahna bawk a sawi leh a. K. Vanlalvena chuan, a hmaa Chief Minister Lal Thanhawla’n cheng nuai hnih dil anga a puhna chu chhang lêtin, “Kum 2013 inthlan dawnah Pu Hawla hote ka inah an lo kal a, contract cheng nuai 100 chuang man min pek an tum a; bolero min pek an tum a, khi bial ka lo vil tawhna senso zawng zawng leh amah ka campaign-pui chuan ka senso tur zawng zawng pawh min pek an tiam a. Cheng nuai khat mai pawh ni lo, cheng khat pawh ka la lo,” tiin a sawi.

NDA candidate Lalduhoma

NDA candidate Lalduhoma pawhin, house tingaihnawmtu tur a nih thu leh a bengchhen tur thu te, thalaite tana dahkham awm lo leh a pung awm lova loan lak theihna a ngaihtuahsak ngei tur thu te a sawi bawk. “BJP nen kan inzawm a ni lo va, NDA-ah BJP an lo tel a ni zawk,” tiin BJP nena an thawhhona chungchang a sawi bawk.

ZONET ‘Zoram Kalsiam’ programme, Lalnuntawma Fanai buatsaihah chuan candidate pathumte an inhmachhawn leh a, he programme hi November ni 14, 2015 zanah ZONET atanga pek chhuah a ni a, he thu buatsaih lai hian chanchin hriat hman a ni ta lo.

Aizawl North-III by-election hi a pawimawh hle dawn a, AMC leh LADC inthlan bakah, kum 2018 MLA election thlengin nghawng a neih a rinawm.