“In the interest of the public, the Government of Mizoram is pleased to relax Para 4 of the ILP Guidelines and hereby authorize R.C, New Delhi, Addl. R.C, Kolkatta, Jt. R.C/Dy. R.C, Mumbai, Guwahati, Shillong and Silchar to issue Temporary ILP without sponsorship to the non-indigeneous person for entering into Mizoram with immediate effect and until further order” tiin.
Mizoram sawrkarin 8.9.2006-a Gazette a tih chhuahah Inner Line Regulation guidelines tarlan niin No. 1 (2)-ah temporary ILP chungchang tarlan a ni a. Hetah hian temporary ILP pe chhuak theitu tur tarlan niin, temporary ILP hmanga Mizorama hnam dang (non-indigeneous) lutte hi ni 15 aia rei lo chauh an awm theih thu a chuang a; temporary ILP dilna application tarlanah sponsor-tu hming leh address dahna tur a awm bawk. Tuna Chief Secretary notification chhuah anga sponsor-tu awm lova temporary ILP pek chhuah a nih chuan, Mizoram-ah hian hnam dang an pun belh hle rin a ni. Kum 1986-a MNF leh India sawrkar inremna (Memorundum of Settlement) Article 8-ah ‘Inner Line Regulation’ state sawrkar râwn lova siamthat emaw, tihbo emaw a ni lovang’ tiin tar lan a ni a; state sawrkar hian tihdanglam theihna nei mah se, a nawm a maka tihdanglam a nih fo chuan he ILP hi a la nghing nge nge dawn niin a lang.
Mizo Hnam inhung bingna dan tia sawi mai theih ILP hi Bengal Eastern Frontier Regulation 1873 behchhana siam a ni a, he dan Act 5 of 1873-ah hian regulate dan tur a inziak a, chumi zulzui chuan Home Department hian guidelines a siam thin a, kum 1995 atang phei kha chuan council of minister-in an approve hnuah official gazette-in notification pawh chhuah a ni tawh nghe nghe a ni. He dan tlawhchhana permit (ILP) nei lova Mizorama hnamdang (non-mizo) an awm a niha hmuhchhuah (detect) an nih hian thawn haw emaw dan anga man emaw an ni thin.
ILP hi sponsor theih zat bituk a awm a, mi pakhat (private) tan tum khatah mi 10 zel sponsor theih a ni a, sawrkar department/PSU/firm/company tan tum khatah mi 100 zel sponsor theih a ni thung. Tunah hian Mizoram puma ILP nei zat chiah hriat a harsa hle a, ILP nei lo hi engtik lai pawhin man tur an awm reng a ni. Mizoram Police-te’na kumin chhung, September ni 6 thlenga ILP nei lo case an register zat hi 46 niin, thawn haw hi mi 242 lai an awm a, tlawmngai pawlte’n eng emaw zat man an nei bawk.
ILP nei sumdawng mi 26 zinga pakhat tih loh chu Aizawl-a mi vek an ni a, pahnih hian Mizo hmingin dawr an siam a, a dang pawh Mizo hming anga ngaih theih dawr siam an awm bawk. An hming diktak hmanga Trade License nei thei si, Mizo hminga dawr an siam leh thei hi thil mak tak a ni a, license issue-tute thiam loh niin a lang.
Aizawl-ah ringawt pawh hnam dang siam dawr a tam hle a, a bikin restaurant a tam hle. Heng mite Trade License leh Inner Line Permit hi a khât tawka endik fo a tha hle a, an Trade License a lo valid tawh lo a nih chuan ILP nei mah se, dân bawhchhia an ni tho tho. Tin, an mi chhawrte hi ILP an neih leh neih loh bakah, a sponsor-tu hriatchian a tha hle a; ILP pe chhuaktu lam fimkhur tawk loh vang emaw, tihsual palh emaw avanga sponsor theih zat aia tam sponsor hi thil awm thei a ni bawk.
MZP hian kum tin hnam dang ILP nei lo dap chhuah beihpui an thlak ziah a, mi thahnem tak an man chhuak thin a. Hei bakah hian kumin, 2015 March thla atang khan Mizo Thalai Pawl (MTP) nena tangkawpin dân lova hnam dang sumdawng dap chhuah beihpui an thlak a, dawr 30 chuang zet chu an khar a ni.
Mizo Students Union (MSU) pawhin kumin, 2015 September thla khan hnam dang ILP nei lo an dap a, zingkar khatah mi 20 zet an man chhuak a, heng mite hi police kutah hlan vek an ni.