Lal Thanzara, Ex-Minister biangbiakna

 ZORAM TODAY | September 1-14, 2015

Tunlaia Zoram titi luahtu ber,  Pu Lal Thanzara MLA leh Minister a nihna atanga a banna chungchangah hian Zoram mipuite aiawhin ZORAM TODAY chuan zawhna tlem kan zawt e.
An puhna che avanga minister leh MLA atanga i bâng hi… 
Sunshine Overseas-a share neia vaibelchhe eng emaw zat pawisa siama, chu company-a chu PWD-ah pawh hleihluak taka duhsakah min puh a, ‘hetiang hi ka ti lo ve, share ka neih pawh ka hre lo va, share i nei min tih atang chiahin ka han zawt a, share nei angin ka lo awm a, ka hre ve chauh alawm’ kan ti a. Chief Minister phei chuan he company hi khawvelah hian a awm tih pawh a hre lo vang. Amaherawhchu, thil awmzia kan sawi pawhin min puh zel a.
An mi puhna zawng zawng hi kan han zir chiang a, highway lampang hnuaiah deuh vek a ni a. He company-in Mizoram-a an thawh hmun hnih hmun thum phei chu chhàn pawh an tum loh, kan Chief Engineer-te’n ‘Nangni chu local contractor-ah chuan in hna a chak a, chhâng hram rawh u’ an ti a, an chhàn luihtir te an ni zawk a.
Chu chu an han zir chiang a, keiina issue-ah pawh ka ngaih loh kha MNF thalai leh an Legal Board-te chuan tihnun zel an tum a, kei leh kan CM leh kan ministry tihhmaimawk an tumna ni berin ka hria. He dinhmun kan neih ve hi Mizo mipui tana rawngbawl kan tumna a nih laiin, heti zawnga min puh a nih chuan, he dinhmun pawh hi ka thlahlel lo ve, mipuiin dikna an hriat nan leh dikna a lal theih nan, kan ministry beihna do lêtna tha ber chu, ka nihna zawng zawng atanga ka bàn ngama bànna ka thehluh hi a ni ka ti a, chu chu ka ban chhan dik tak chu a ni.
Australia-a awm Laltanpuia Pachuau hmalakna avanga bang niin an sawi che a…
Khami chungchang kha, HP Food Products hnuaiah hian biscuit kan siam a, Mizoram-ah chuan a nei chhun kan ni. Tun hma PC hun lai atang tawhin Social Welfare-a nutrition hnuaiah biscuit kan supply tawh a, MNF hun lai pawh khan kan supply reng a. MLA ka nih hmain ka fapa hian MBA a zo va, a kutah ka dah a, tun thleng hian a la enkawl ta zel a ni. Mahse, keini hian dân leh hrai kan lo hre em em lo va, technical thil eng emaw tihsual kan lo nei a nih pawhin ka pha lo. Amaherawhchu, thil dik lo a lo awm a nih chuan kan hriat loh vang a ni.
Inleng te kan nei a, ‘Ngawi teh, nang hi i bâng ringawt a, Liando Workshop neitu hi chumi khami chu a nia, Zoplast tuizem siamtu pawh chumi khami chu a nia’ an ti a. Liando Workshop neitu chu kan hre mai a ni, mahse, ani chuan a fapate hmingin engtin emaw an lo dah a ni maithei. Kei pawh ka fapa kutah a awm vek tawh a ni. Ka tihdik loh ka pawm avanga bang ka ni lo. Heng inpuhmawhna zawng zawngah hian ka fihlim a ni tih kha mipuiin an hriat ka duh vanga bâng ka ni.
Sunshine Company-a share neia an puhna che laka i fihlim a nih si chuan, hlawkna nei anga puhtu che scroll.in reporter leh ECI-a zualkotu chungah court-a kal emaw, defarmation case emaw file tumna i nei em?
Khin tumna ka nei lo va, defamation case file tumna pawh ka nei lo. Ka sawi tawh angin MLA ka nih hma atang tawha din a ni a, MLA ka nih hnu hian dan leh hrai anga tihfamkim tur, lo tihsual palh pawh ka nei a ni maithei. Chung avang chuan va challenge-a khatianga va tih tumna kha ka nei lo. Tin, HP Food Products-ah hian ka thiam fihlim e ka ti lo, amaherawhchu, hei hi a bul ka tan a ni a, vawiin ni thlengin ka fapain a enkawl a ni.
Company share chungchangah khan, signature tel lovin a tih theih em ni min ti a, signature vawi khat mah ka pe lo. A thu hrimin Indian politician-ah hian mi tam takin share an nei, crime a ni lo. Company-ah khan kum 2012 thleng share nei angin min ziak a, lo nei tak tak ta tehreng pawh ni ila, kha term kha a liam tawh. Chuvangin share lo neiin, share neih hi crime lo ni pawh ni se, khami avanga thiam lohna tur ka neih ka hre lo.
‘Application form inhman tawm lohvin share a neih theih loh, signature a awm tur a ni’ an tih hi…
Kum 2012 khan hetiang form fill up-a tih hi an la introduce lo. HP Food Products-a ka mi chhawrin eng emaw a lo ti a nih chuan thuhran, ka inrawlh lo. Share chungchangah hian signature pakhatmah ka pe lo. Pathian hmingin ka sawi ngam, Pathian pawi kan sawi em lo vang chu. ‘A document engkim kan nei vek tawh alawm, um zui a ngai hleinem’ an ti a, a dik maithei. Document chu a awm ang. A chhan chu ka hming kha 2009-2010, 2010-2011, 2011-2012 thlengin a awm tlat a. Ka signature anga an lo ti a nih chuan thu dang, signature ka pe lo ve.
Sunshine Overseas nena in relation…
A neitupa te hi unau pali an ni a, MNF sawrkar laiin an unau zinga pakhat Ajay-a, tuna enkawltu ni lo hi a lo kal a. Atta siamna dinpuiah min sawm a, MNF-ah contract kan hmu thei bawk si lo va, tha ka ti hle a. ‘Mithiamte engkim keiin ka rawn ngaihtuah ang a, employee angin min hmang la’ a ti a. Tichuan, kan din chho ta a. Kan tum ang lo deuhvin a mill, suzi, maida her chhuahna khawl kha kan din ta a ni. Tichuan, sawrkarin material min pe a, kan her a. Supply-ah quota kan pe a, kan zuar a, chutiang chuan kan ti chho va. Chuta tang chuan biscuit hi kan ti chho char char a ni. Ajay-a chuan business dang tiin chu business chu tunah Sanjay-a hian a rawn take up ta a ni.
HP Food Products leh Sunshine Overseas-ah khan connection pawh a awm a ni maithei. A chhan chu HP Food Products-a ka mi rawih leh Sunshine Overseas neitu kha thuhmun a ni a, chuvang chuan paper-ah chuan eng emaw a lo a awm a nih pawh ka ring, ka pha lo.
MZU kawng siam chungchang kha…
Khatih lai khan PWD hi ka chan a nia. Khu kawng khu JNNURM pawisa atanga siam tur a ni a. MZU kawng leh Aizawl khawpui chhung blacktopping hna hi Sunshine Overseas chuan ‘khaw chhungah chuan kan siam lo vang’ an ti a, ‘siam hram rawh u, rawn thawk hram rawh u’ kan ti a, chhim leh hmarin Sanjay-a te leh Tantia-te’n an insem a ni. An contract avang khan, Pathian khawngaihna avangin vawiin thleng hian naia khat mah hi hlawkna ka têl lo.
By-Election kan neih vat a rinawm a..
Kan hotu, nomination committee-te’n ding rawh an tih chuan kan ding ang a, ding suh an tih chuan kan ding lo mai ang.
ECI-in i chungah hremna lek sela…
ECI-a complaint kha thutlinga an pawma kan chuh theih tawh loh chuan MLA lamah kan kal lo vang a; kan kal tawh laklawh a, party-te’n hman tlaka min ngai a nih chuan party lamah kan kal zel ang chu. 
Laltanpuia Pachuau hi…
Ka hre chiang vak lo. A pa hi kan thian tha a ni a, a nu, Pu Nithanga fanu hi ka nupui school friend a ni a, Shillong-ah Pine Mount-ah te an lut ho tawh a ni. Inchhungkhat lamah chuan min chhangtu chiah U Thannguri pasalte nen an inchhung. Mi huatna chhan tur hi ka hre lo va, huatna pawh ka nei bawk hek lo. Email mi rawn thawn a, min be bawk.
Hetianga ka bâng hi thenkhat chuan min lo tawrhpui viau a, mahse, ka thinlung a zangkhai em em a ni. A chhan chu, cheng chuti zat khawih chingpen tih lampang hi ka bàn chhan ni lovin, thudik ka duhna avanga bâng niin ka inhria a, hei hian ka rilru a tihahdam a ni.
Vanduaithlak takin kan han indeusawh viau tak nain, kan politician lar tha tha leh MNF-a an hotu lawk ber berte chu bail-a awm mek an ni fur alawm. Ka bàn chhan, sum leh pai khawi chingpen lam a ni lo hi Pathian-in mal min sawmna pawh niin ka hria a, hemi avanga tihtakzeta min lainattu pawh an tam phah hlein ka hria.

1 thought on “Lal Thanzara, Ex-Minister biangbiakna”

Comments are closed.