BookBank-1

ZORAM TODAY | March 1-14, 2016 C. Lalawmpuia Vanchiau

SUNSET SAFARI
by Samson Thanruma
A Man: Rs 300/-
Phek: 325 +
Chhuah Kum:  2015   

Genre: nature/environmental


Tun hma chuan silai nen ramsa kan veh thin. Ram a thang a, tunah chuan camera nen sa kan pel ve ta thung. Rajasthan-a Keoladeo National Park atanga dacoit hmingthang Phoolan Devi lo chettlatna thin Chambal lui dung zawh zelin, Jim Corbett National Park leh Panna Tiger Reserve-te paltlanga South Africa-a Kruger National Park, South African Wildlife College leh hmun hrang hranga lehkhabu buatsaihtute chettlat dan chanchin hi a ngaihnawm a, a bengvarthlak tel bawk. Lehkhabu kan la neih ngai loh chi kan neih belh leh ta hi a lawmawm hle.  


Kan rama ramsa hmuh tur awm ve lo – African wild dog, African sai, African penguin, African wild buffalo, stork billed kingfisher, Nilgiri langur, Chacma baboon, impala, Bateluer mupui, hippopotamus, ostrich, sakeibaknei, wildebeest, cheetah, giraffe leh tunhmaa kan rama awm thin tumpangchal, sai rual, sazuk rual leh awle thlalakte colour a zeh tel a ni a; heng thlalakte hi lehkhabu buatsaihtu lak vek a nih bakah a lehkhabu chhiar a tinuamin a tihlu tel hle a. Novelist Samson Thanruma lehkhabu thar ber hi a man tam mah se, a to lo. 


KHAWTHLIR TLANG ATANGIN
by PB Lalrammawia
A Man: Rs 100/-
Phek: 183
Chhuah Kum:  2015   
Genre: article/short stories

The Aizawl Post Jt. Editor PB Lalrammawia kutchhuak hmasa ber, article hrang hrang leh krismas short stories dahkhawmna hi chhiar manhla tak a ni. Lehkhabu hi thuang thuma then niin thu chi hrang hrang chhiar tur 16 a awm a. Then khatna: Kalama lamah, India President leh kei, Khuallian nen kan tlai, Sapho Aizawl ka fanpui a, Tute emaw vangin – tihte hi journalist a nih anga a dai-hriat khawvel a pho chhuahna a ni a. Mi nawlpuiin kan hriatpui lem loh, journalist-te hun hman dan leh an tawnhriat hriat belh hi a bengvarthlak hle. 

Then hnihna Thu Zangkhai huangah hian: Bike Racing, Phai ramah darkar 3, Hnunglam, Zing dar 2-ah ‘Letter to Heaven,’ No Charge, The Outlaw’s Prayer tihte dah a ni a. Heng hi thu zangkhai leh a hlimawm zawnga ziah a ni hlawm. Then tawp berah thawnthu tawi, krismas lam hawi dah a ni ve thung a. Chu zan silai reh lai tak chuan, Ka nu thawnthu min hrilh leh mai rawh, Ni chhuah hmain, Thingtlang tleirawl pahnih, Zualtea tih thawnthu tawite hi thu lungkuai leh ngaihtuah zui ngai, ngaihnawm taka ziah a ni.