Thla 9 chhungin Assembly Speaker enkawl nan cheng nuai 65.23 hmang tawh

by News Editor

Tualchhung News

ZORAM TODAY| 4th September, 2024 (Wed): Assembly Speaker bungalow-a bungraw mamawh lei nan Assembly Secretariat sum aṭangin cheng nuai 12.86 sen ral leh a ni.

RTI Act hmanga zawhna Assembly Secretariat chhan danin Speaker bunglow-a hman tur bungraw chi hrang hrang lei a ni leh a- furniture, tv, washing machine, computer. etc, item hrang hrang 240 chuang leina a sum sen ral hi ₹. 12,86,333 a tling.

August ni 27 khan MNF party chuan thuchhuah siamin, RTI Act hmanga zawhna Mizoram PWD Building Division-in an chhan danin, ZPM sorkar hnuah Assembly Speaker Lalbiakzama Bangla cheiṭhatna leh bungraw lei nan ₹. 23,40,000 sen a nih thu an tarlang a. Bangla cheinan bik ₹. 8,40,000 sen niin bungrua (Sofa, dining table, doormat, etc.) lei nan ₹. 1,500,000 sen a nih thu an lo tarlang tawh a.

ZPM sorkar hnu, thla 9 chhunga Assembly Speaker enkawlna senso atan PWD aṭangin ₹. 23,40,000, Assembly Secretariat atangin ₹. 12,86,333 leh car Mahindra XUV 700 AX7L lei nan ₹. 28,97,631 hman tawh niin, sum hman ral belhkhawm hi ₹. 65,23,964 a tling tawh.

MNF chuan, ZPM hi an sawi loh ang hlirin an awm tih hi chu tlang hriat a ni tawh a. Mipui pawhin ngaiah kan nei tawh a. Chutih laiin sum renchem leh sorkar insawhngheh kumah an puang mek an ti a.

"An mahni ber a bawhchhetuah an ṭang zel mai hi a pawi hle a. Sum indaih lohna avangin Zoram pum kawng chhe em em pawh an siam thei lo a, sorkar-in vaibelchhe telin sum a puk reng a. Chutih laia Bangla cheibawlna tura sum tam tak a luang hi a uiawm hle," tiin an tarlang tawh a ni.

Chief Minister atana Lalduhoma lakluh a nih a, chanchinbu mite a kawmna hmasa berah an sorkarah minister ten bunglow an luahin cheithat an tum loh thu a lo sawi tawh a.

“Heng bungalow te hi minister te’n lungawi taka an luah mek a ni a, furnishing hi tih ṭul kan ti lo, a awm ang ang hian kan chhâwm ang,” a lo ti tawh a ni.

ZPM hruaitu PL Liandinga pawhin, "Tunhnaiah Mizoram Assembly Speaker bangla chei nan cheng nuai 23.40 zet a hmang a, motor lei nan cheng nuai 28.97 zet a hmang angin a lo lang a. A zia lo ngei mai. He thu hi dik lo hlauh se ka lo ti ve em em a, ka lo hre sual palh a nih chuan ngaihdam ka dil a, ka hre sual lo a nih hlauh chuan he thu hian rilru a hruai thui khawp mai," tiin September ni 4, 2024 a Vanglaini chanchinbu 'Zalen Huang' ah a tarlang ve bawk.