EF&CC department chuan, "Bethlehem Vengthlang YMA President leh Chairman, Local Council te chuan ni 5.7.2024 khan Principal, Forest Training School hnenah ziakin, Forest Training School Tennis Court paltlanga kawng awm sa chu tih zauh deuh a, laih tlang an tum thu leh an hmalaknaah harsatna siam lo turin FTS Principal chu an hriattir a ni," an ti.

Principal, FTS chuan, Forest Training School compound chhungah kutthlak phal a nih loh thu leh, phalna nei hmasa lo chuan kutthlak lo tura hriattirin, an thil duh chu dan ang taka kalpui anih theih nan an sawi anga ruahmanna awmsa a lo awm anih chuan a rang lama theh lut turin hriattirna lehkha ni 11.7.2024 ah a tichhuak a, he lehkha hi Chairman, Local Council, Bethlehem Vengthlang leh President, YMA, Bethlehem Vengthlang te pek an ni, an ti a.

"Hemi hnuah hian Principal, FTS chuan lehkha ni 22.7.2024-ah tichhuak lehin, Chairman, Bethlehem Vengthlang Local Council leh President, Bethlehem Vengthlang YMA te chu mahni thua kutthlak lo tur leh, FTS Complex chhungah phalna nei lova kutthlak a awm anih chuan dan anga kalpui a nih tur thu hriattirna siam nawn lehin, khawtlang tana ram mamawhna a awm a nìh chuan dan anga kalpui a nih theih nan an lehkha neih sa te, ruahmanna awm tawh sate a rang lama thehlut turin a hriattir a. Mahse, hetih mek lai hian, Principal, FTS hriattirna chu ngai pawimawh lovin, ni 23.7.2024 zingkarah Gate leh Tennis Court fencing te tichhiain, kawng hi laih tan a ni," tiin an tarlang.

"Hetianga dan lova Sawkar hmunhma tichhe zawnga Bethlehem Vengthlang mi thenkhatte hmalakna hi Forest Department in pawi a tiin a dem hle a. Sawrkar hmun pawimawh Forest Training School complex chhunga dan loa chetna hi kan dem tak zet a ni," an ti bawk.

Sorkar chuan helaia kawngpui sial chungchang hi uluk takin a ngaituah mek a, mipuiten an mamawh dan te leh FTS ram neih dan te pawh a zir chiang mek a ni. Hetih laia thuneitu sorkar rawn hmasa lo a thil tichhe zawnga sorkar ram chhunga chet lak hi khua leh tui thate tihdan turah Forest Department chuan a ngai lo a, hetiang thil hi thleng nawn tawh lo se a duh tak zet, tiin.