Sialhawk Lakhuihthei Society hruaitute hnen atanga Zoram Today thudawn danin, an khua-a lakhuihthei la chhawng tute hnenah a pum tha deuh chu Kg 1 cheng 12 leh a pum pangai deuh kg 1 cheng 10 tein an pe chhuak thin tih an sawi a. Chuti chung chuan hralhna an hriat that loh thu sawiin, tun dinhmun ah pawh kan ti chhe nghek nghuk mai a ni, an ti.

"Kum dangah pawh a hralhna ah hian kan buai tho a, mahse, kumdang aiin kumin hi kan buai zual deuh a ni. Hei bakah kan thlawhhma panna kawng chhe lutuk hi kan tuar tlang viau bawk" an ti.

An thlawhhma panna kawng, link road hmun hran hrana mite belhkhawm thui zawng hi km 40 vel a ni, an ti a. Kumdangah chuan heng link road chhia leh khuarte siamthat na tur hi MLA ah kan sawi a, DM & R dept. ah te kan sawi bawk a, a thua kan sawi kha an lo pawm a, pawisa lo thlen hmain hma kan la thei a, kan ziaawm phah viau a, kumin ah erawh kan beisei angin thil a kal ta lova, kan buai phah hle a ni, an ti.

"Tunah hian Khawzawl DC hnenah kan huan kawng chhe siamthatna tur pawisa kan dil mek a, hei hi min pe thei se kan ti khawp mai, kan buai zualpui pawh a kiam deuh thei ang," an ti bawk.

Sialhawk khua ah hian lakhuihthei ching chhungkaw 250 vel an awm mek a, nikum khan quintal 14000 vel an thar niin an sawi a, lakhuihthei avanga sum lakluh hi nuai 160 vel a tling niin an tarlang.

"Kumin hian qtl 20000 kan thar ang kan tia, kan tang tlang khawp mai, mahse, rial tla kan tuar a, hetiang zat hi  kan thar thei ang em kan ti a, a tlem berah nikum ang zat kha chu thar theih kan in beisei tho," an ti a. Tunah hian quintal 6000 vel thar chhuak tawh ah an in ngai a, September thla chawhnu lamah chuan a rem deuh tawh turah an ngai.

Nikum lamah MIFCO in an lakhuihthei an laksak a, lawmawm an ti hle a, tunah hian an laksakna cheng nuai thum bawr an la bat sak a, "Min pe thei tawhse kan duh khawp a, kan nawr vak ngam lo, kumin hian min laksak leh se kan duh bawk si," an ti.