Operation Ginger - Fehchhuah Runpui team te chuan vawiin khan Neihloh khaw ram chhunga Tuitam Zaua sawhthing hmun kalchilhin kuthnathawktute hnenah Sawhthing tam leh natna avanga an harsatna tawh mek lak atanga inven dan leh enkawl dan chipchiar takin an zirtir a. He operation ah hian Dr Jenny Zoremtluangi, Deputy Director chu Team Leader a ni a, Dr. Vanlalremruati Hnamte, Deputy Director leh Lalrempuia Fanai, District Horticulture Consultant te nen Aizawl atangin Neihloh khua hi an pan a. Department of Horticulture, Serchhip District atangin R. Lalrintluanga, DHO leh a thawhpuite an tel bawk a ni.

Team Leader Dr. Jenny Zoremtluangi chuan Sawhthing chin chu Sawrkar flagship programme pawimawh tak pakhat a nih thu a sawi a. Sawhthing tam buaipui leh a natna enkawl dan zir tura kalkhawm kuthnathawktute chu hun lo la kal zel turah pawh midangte zirtir lehchhawng tu ni turin a chah a. Operation Ginger - Fehchhuah Runpui hlawhtlinna tura pawimawh ber chu kuthnathawktute an ni, a ti. 

Vawiina sorkar thuchhuah tarlan danin, Operation Ginger-Fehchhuah runpui hi Mizoram pumah neih a ni dawn a. Serchhip District ah pawh Serchhip DHO Office chuan kengkawhin thla khat chhungin Serchhip District puma khaw awm zawng zawng an fang chhuak dawn a. Horticulture mi thiam te leh thawktute hi team 4 ah inthenin khaw hrang hranga sawhthing hmun an kalh chilh a nga, sawhthing tam enkawl dan zirtirna hi an pe thin ang.