Aizawl 13th May, 2024: Vawiin khan Mizo Hnam Run-ah MNF party chuan chhung inkhawm neih an nei a. Er Lalrinawma Ex Minister, General Secretary chuan thusawiin, "SASCI sum crore 223 lai lapse-te khan 'sum lapse a awm lo' tia ZPM-in thuchhuah an siam hnan vek a ni a. Kan MLA ten haichhuak hlauh lo se chuan mipuiin a lapse tih pawh kan hre lovang," a ti.

Minister hlui Er Rinawma chuan, "SASCI sum lapse avang khan Mizoramin sum kan chan ngei ngei tur tam tak kan chán phah a. GST-ah ringawt nuai 2000 chuang Mizoram sum bawma lut tur kan chan a, labour cess-ah tam tak kan chan bawk a, tin hnathawktute inhlawhna tur nuai tam tak a luangral bawk a ni. A uiawm tham tak zet zet a ni," a ti a. "Hei mai bakah hian veng leh khaw hrang hrangin hmasawnna an dawn tur, khelmual, Community hall leh thil dang dang an neih loh phah ṭeuh dawn bawk a ni. A pawi hle," a ti bawk.

Er. Rinawma chuan, "MNF Party hi Mizorama party insawh nghet ber leh ruhrel lian ber kan ni a. Mipuite thlavang hauh turin kan theih tawp kan chhuah zel dawn a. Sorkar kal dik lo veng tur te, ram mipuite thlamuan turtein theih tawp kan chhuah zel dawn a ni," a ti bawk.

Pi Chuauzikpuii, Corporator, AMC pawhin he hunah hian thusawiin, "Kan ramah hian e'nge thleng a, kan sorkar hian e'nge a tih, tihte hi mipuiin kan hre tur a ni a. Politics ngaihven hi a changkang a, khua leh tui ṭha chuan ram inrelbawlna hi kan ngaihtuah ngei ngei tur a ni," a ti.

Pi Zikpuii chuan, "Sorkar-a tel kher turin party-ah kan awm tur a ni lo a. Khawi party-ah pawh awm ila sorkar kalphung hi ngun takin kan lo zirin kan lo bihchiang ve tur a ni," a ti bawk.   

Chhung inkhawm hi Pu Michael Lalthanmawia, Adviser-in a kaihruai a, Pu R Lalzirliana PAC-in hunserh a hmang a ni.