MLA fund nuai 100 pe chhuak; sum enkawl kawnga a ngaihna hria Chief Minister kan chhuang- ZPM

by News Editor

Tualchhung News

ZORAM TODAY| Aizawl 8th August, 2024 (Thurs): Vawiin khan ZPM Party chuan thuchhuah siamin, ZPM kaihhruai kalphung thar sawrkarah MLA-te hnenah MLA fund zâtve cheng nuai 100 ṭheuh ṭum khata pek chhuah a ni hi a lawmawm kan ti hle a ni, an ti.

“Sawrkar hun dangah chuan MLA fund hi tlem tê tê-in installment 4-te a pek chhuah a ni ṭhin a, MLA leh bial mipuite tân hmasawnna hna tak tak thawh dawnin a buaithlâk ṭhin hle a ni; hetih lai hian kalphung thar sawrkarah MLA 40-te'n cheng nuai 100 ṭheuha an chan tur cheng vaibelchhe 40 pek chhuah a ni hi sawrkarin hmasawnna hnathawh kawng a taka a ngaihtuahzia a tilang chiang hle a ni," tiin MLA tan a thlamuanthlak tur thu an sawi.

ZPM chuan, MLA Local Area Development Scheme hi bial chhûng cheina tur leh bial mipuite tihhmasawnna tur a nih avângin sawrkar tharin a ngai pawimawh hle a, MLA fund pawh kum khata nuai 150 ni ṭhin chu nuai 200-ah tihbelh a lo ni tawh a ni, an ti bawk.

MLA bial 40-te chanpual fund zatve ṭum khata pek chhuah a ni hian MLA zawng zawngte'n an bial chhûnga hmasawnna hna an thawh kawngah kawngro a sut ngei kan beisei a, sum enkawl kawnga a ngaihna hria Chief Minister Lalduhoma, Finance Minister ni bawk leh TBC Lalvenchhûnga, Adviser to CM leh thawktute kan chhuângin an chungah lawmthu kan sawi takzet a ni, tiin an thuchhuah ah tarlan a ni.