Chief Minister & HPC Chairman Lalduhoma chuan Mizoram State University dinna turah sawrkar laipuiin inngaihtuah nan state sawrkar chu kum 15 hun a pek thu sawiin, kum eng emaw zat la awm laia a hmun tur tihfel a ni ta chu lawmawm a tih thu a sawi a. 

Lalduhoma chuan, a hmun tihfel chu class la a, a taka kalpui nghal tur tihna a nih loh thu sawiin, a hmun neih bakah, infrastructure hrang hrang – building, kalkawng, tui, eng leh tih tur hmabak tam tak a awm thu leh zirtirtu (faculty) lak te pawh hmabak a la awm thu a sawi a. Hetih lai hian a bul ṭan tur, office hawng nghal tur leh a ṭul ṭul thawk tur ruahmanna siam mek a nih thu sawiin, anni'n a hmuna ṭhut chilhin, a tahtawlin a ṭul anga hma lak zel a ni dawn tih a sawi.

Chief Minister chuan MZSU din tur chungchangah Mizoram sawrkar chuan chhim lama political party, NGO, kohhran leh mipuite duh dan hriain, zahawm an tih thu leh dodalna hrang hrang tawn tlang a, Lungleia dah turin thu tlukna siam a nih thu sawiin, thu tlukna siam fel hnuah pawh nawrna tam tak a awm chungin sawrkar chu a dinna ngaia a din tlang thu a sawi.

CM chuan MZSU hlawhtlin nan zavaia inṭawiawm tlan a ṭul thu sawiin, infrastructure lian tur a nih avangin tlo leh khuarei daih, a nihna ang tak ni turin a bul ṭhut, a ban phun aṭangin dik taka a kal a ngai tih a sawi a. Lunglei mipuite chu duat taka enkawl tur leh neitu thinlung pua thawk ho turin thawh hopuiah a sawm a. Dik lo leh fuh lo a awm palh pawhin a tlai hmaa siam ṭha thei turin inhrilh leh infinchhuah tlan a pawimawh thu a sawi bawk.

MZSU dinna atan ram pe thei tlawmngai tam tak an awm tih sawiin, an inphalnaah lawm thu a sawi a. Ram ṭha leh remchang tak, bigha 12 laia zau petu P. Lalnuntluanga te chhungkaw chungah Mizoram sawrkar leh HPC ai awhin lawm thu CM chuan a sawi a. An ram pek chu a hmun hma a remin, education complex anga cheibawl theih a ni dawn tih sawiin, chuti ang ram ṭha hmuhna tura HPC thuneitute'n taima leh ṭhahnem ngai taka hma an lakna leh theih tawp an chhuahnaah lawm thu a sawi a. Sawrkar hma lakna atana mimal ram pe phal an awm ṭhin chu lawmawm a tih thu sawiin, ram inpek chungchanga inremnate ṭha taka ken kawh a, record fel tak neih a ṭul thu a sawi.

Lunglei HPC Vice Chairman V. Malsawmtluanga, MLA chuan hun kaihruaiin, Mizoram sawrkarin Lungleiah MZSU dah tura a pawm avangin lawm thu a sawi a. Lungleia MZSU dah a nih theih nana a tir aṭanga ngaihtuahna senga hma latu zawng zawngte, phal taka an ram pek huamtu leh tuna ram zau tak, phal taka petu Pu P. Lalnuntluanga te chhungkaw chungah te lawm thu a sawi a. MZSU hlawhtlin nan leh hmasawn zel nan theih tawp chhuah zel turin a chah bawk.

MZSU ram tur inhlannaah hian Lunglei khawpui bialtu MLA te, Lunglei Municipal Council (LMC) Councillor-te; Lunglei DC leh SP te bakah ram neitu P. Lalnuntluanga te chhungkua te; HPC Board member-te; YMA Sub-Headquarters Lunglei, MHIP Sub-Headquarters Lunglei, MUP Headquarters Lunglei, MZP Headquarters Lunglei, MSU Regional Headquarters Lunglei leh MJA Lunglei District hruaitute; political party hruaitute; School Reform Committee leh MZSU Demand Committee member-te an tel.