Mitthi ruang phurh chungchangah sorkar kaldan tur la hriat loh

by News Editor

Tualchhung News

ZORAM TODAY| 20th July, 2024 (Sat): Mizoram sorkar chuan mitthi ruang phurh sorkar mawhphurhna ah a dah a, hemi senso atan 2024- 2025 budget ah nuai 500 dah a ni. Vawiin thlengin sorkar kalpui dan tur hriattheih a la nilo thung.

Ruang phurh chungchanga hmalak dan tur hrang hrang ngaihtuah turin Mizoram sorkar chuan Social Welfare & Tribal Affairs department kutah a dah a. RTI Act hmanga zawhna department chhan danin, "Sorkar in official notification a la tihchhuah loh avangin engmah hriat theih a ni lo, a kalpui dan tur notification nghah mek a ni," a ti.

Zoram Today hriat dan chuan, department hian ruang phurh sak chin turah hmalakna leh ruahmanna an siam mek a, sorkarin mitthi ruang phurh man a tum turah hian mi zawng zawng a huam dawn lo a, mitthi chhungte dinhmun azirin sorkarin phurh man a tum dawn nia hriat a ni. Ruang phurh man leh senso tum tur chin pawh felfai taka siam an tum nia hriat a ni bawk.

Hetih lai hian, sorkar term thar ah, MLA te’n an bial mi, ruang thawn ngaite an la tum char char a, mitthi ruang thawn nan an mimal sumin a daih seng lova, an MLA fund atang te pawhin ruang an thawn ṭhin niin Zoram Today chuan thu a dawng.