Kan zawhna parukte hi supply minister hian chhang rawhse: MNYF

by News Editor

Tualchhung News

ZORAM TODAY| 14th August, 2024 (Wed): Vawiin khan MNF Thalai chuan thuchhuah siamin, tunhnaia Supply minister in Press mite a kawmna ah mipuiin sawifiah tura kan beisei leh kan hriat duhte engmah a sawifiah lova, keini MNYF te chuan a hnuaia zawhna 6 te hi chhanga sawifiah ngei turin kan phut a ni, an ti.

MNYF zawhna siamte: 1. Phuldungsei khua a Ration Cards paihsak tak mi 85 te hi Mizoram RCMS ah an ration cards te an Adhaar card nen online a link/thlunzawmin dahngheh (verified & approved) an ni tih hi i hria em aw?

2. Heng mite ration cards hi Mizoramah online a Adhaar nen thlunzawm a nih hnuah hian Tripura sorkar RCMS ah online in an adhaar cards nen a thlunzawm/link ve theih tawh loh tih i hria em le?

3. Supply Minister hian heng mi 85 te ration cards hi April 2024, May 2024 leh July 2024 ah te i Deptt enkawl lai ngeiin Ration cards neitute hriat miah lovin Mizoram Ration Cards aṭangin an paih chhuak/deleted tih i hria em?

4. Hetia Supply Deptt in an deleted/paih tak avang hian Tripura RCMS ah an awmnghet/senglut si a Mizoram in online chuan ration cards a pe thei tawh lo zawk a ni tih i hria em aw?

5. Supply Minister i nih hmaa MNF Sorkarin Mizoram RCMS ah an Ration cards leh Adhaar a zawmsak a, Verified & Approved vek an ni chunga ration cards paihsak an ni hi dik i ti maw?

6. Hun hmasa a Mizorama sorkarna changtu Congress, PC, MNF sorkar ten fimkhur takin Phuldungsei khua leh a mi chengte hi an enkawl ṭhin a. Sorkar hmasaten Mizorama an ration cards an lo dahngheh tawh sa hi eng rilru pu in nge ZPM sorkar hian in paihsak tak mai le?

Ramri a awm Phuldungsei khuaa Mizo chengte hi Tripura sorkar chuan hma khawsang aṭangin a ta neih thiamin ration cards leh electoral roll ah te a dah a. An paihsak duh reng reng lo. Mizoram sorkarin a paihsak mai hi a pawi thui hle a ni, MNYF chuan an ti.

MNYF chuan, a changtu Minister hian a sawifiah theih loh chuan hnam pawi an khawih a ni tih hria in mawhphurh na la in bang ngam rawh se, tiin an thuchhuah ah an tarlang.