Chief Minister chuan, heng natna pahnih hi nunphung vanga natna ve ve an ni, a ti a, "HIV bik hi vanduai vanga kai theih a ni nain chutianga kai chu an tam lo. Mizorama kai zaa 60 te hi mipat hmeichhiatna condom tel lova hman vanga kai an ni a, a dang zaa 30 hi ruihhlo ti thin te an ni" a ti.

MSACS chuan HIV kai mi 16,217 vel an enkawl mek a, HIV natna kai hmuh chhuah, an chin hriat zui si loh hi mi 633 an awm. Heng an chin kan hriat zui loh kan thian te hi kan ngaihtuah hle mai a, an hnaih ber ART Centre lo pan theuh turin ka ngen a ni, an ti.

Chief Minister chuan, HIV hi kan do hneh thuai theih nan a kai mek kan hmuh chhuah zung zung a ngai a, inringhlel kan lo awm a nih chuan rang takin in-test ang u. Baseline survey neihna sum pawh hi Mizoram sawrkarin kan tum tawh dawn a ni. Mi a inhriatchhuah rana ART damdawi tha taka a lak bawk chuan rei tak a dam zui thei. Nu, HIV kaiin nau a hrin pawhin enkawlna tha tak dawng chunga nau a pai chuan a fa kha a him thei a ni, a ti.

Health Minister Lalrinpuii pawhin thusawiin, ruihhloin Mizoram min run nasa a, a injection zingah Middle School zirlaite pawh an awm tih hmuh chhuah a ni. Khuh damdawi pawh hralh a kal viau nia sawi a ni. Kan dinhmun chhiatzia hi hriaa mitinin kan do a ngai a, vawiina kan hawn campaign pawh hi mipuiten lo ngaihven se kan duh hle, a ti a.

"In tin leh khawtin thleng phak campaign neih kan tum ang. Sawrkar pawhin ruihhlo vanga kan thalaite tawrh na te, HIV leh STI hluarzia te hriain hmalak kalpui chho mek a, State Council on AIDS te tuai thar lehin MLA zawng zawng te pawh he hmalaknaa hman tangkai kan tum a, kohhran leh tlawmngaipawlte pawh nasa zawka thawhpui kan tum a ni" a ti bawk.

He campaign hi September leh October thla chhung kalpui a ni ang. Sangchhin Chinzah, Secretary, Health & Family Welfare chuan kal khawm te lawmna thu a sawi a. Dr. Lalthlengliani, Project Director, MSACS chuan lawmthu sawiin a hawnna inkhawm hi khar a ni.