Dr. Lalthlengliani, Project Director, MSACS chuan an dinhmun leh hma an lak thin dan te chipchiar takin sawifiahna a nei a. Tunah hian MSACS chhinchhiah danin HIV vei ART damdawi ei mek 16217 an awm mek a, an zinga mi 500 vel hi chu ram dang mi an ni. 

Hmuh chhuah zingah hian ART ei duh lo, chhui zui theih loh mi 633 awmin, HIV vanga nunna chan chhinchhiah 5021 an awm tawh a ni. MSACS hian district tinah ICTC leh ART an nei vek bawk.

National AIDS Control Organization (NACO) hnuaia estimate lam thiamten kum 2023 a Mizoram dinhmun an chhut danin puitling zinga za zela 2.73 (%) te hi HIV kai thei (state wise Adult HIV Prevalence in % in 2023) dinhmuna ding niin a ngai a. Hei hi India ramah a sang fal hle a, national level chu 0.2% chauh a ni. Hetianga Mizoram prevalence rate a san chhan hi Mizoramin HIV kai kan hmuhchhuah tam vanglai (peak level) a thlen tlai bik vanga ngaih a ni a. 

Kum 2017 khan Mizoram peak level hi a thleng chauh va ngaih a ni a, HIV kai nei tam state dang te chuan 2005 chhovah khan an peak level an lo thleng tawh hlawm a ni. Mizoramin hmuhchhuah san lai ber (peak level) a thlen hnu hian kai thar hmuh chhuah zat hi a tlahniam zui ve hret hret.

Nu, HIV vei ten nau an paiin an naute chu HIV laka venhim theih a ni a. Hetianga HIV inkaichhawn hi tihbo hmiah tumin tan an la mek a. Nikum chhung pawh khan HIV vei nu nau hring mi 120 atangin nautea kai zui ta hi pahnih chauh an awm tawh a ni. Hemi hmalakna hi a hlawhtlin ngei theih nan nu naupaite dinhmun hi rang taka hriat a ngai thung.

MSACS thawktute hian tuna an kal dan anga HIV/AIDS do hna hi tha taka a kal zel chuan a darh zel tur hi khuahkhirh theih hun a la thleng theiin an ring.

Report kimchang an ngaihthlak hnu hian an hmalak zui dan tur te an rel a ni.

He meeting ah hian Vanlalhlana, Minister Transport Department,  PC Vanlalruata, Agriculture Department bakah State Council on AIDS member te an tel, niin vawiina sorkar thuchhuah chuan a tarlang.