July 8, 2024 a RTI Act, 2005 hmanga zawhna, 'April 2024 atanga March 2025 thlenga Buhfai suppliers tur thlanna-ah khan Tender chhang hniam ber kha thlan a nih loh chhan min hrilh thei em?, tih F, CS&A department SPIO in July 22, 2024 a chhan na chu, "Buhfai suppliers tura thlanna-ah khan tender chhang hniam ber thlan a nih loh chhan chu, buhfai quality hi Grade 'A' turah Grade 'C' supply tura a chhan vangin" tiin a chhang.

Food, Civil Supplies & Consumer Affairs department chuan March, 2024 khan Buhfai supply tu tur Limited Tender a ko a, Firm pariat laiin an in chhan hniam siak a ni.

RL Store, Kulikawn chuan chhang hniam berin, buhfai Grade 'A' quintal 1 ah Rs. 3400.50 a a supply theih tur thu department a hriattir a, department hian buhfai hi Grade 'A' supply ngei tur a nih thu lanna form siam sa, 'quatation for supply of rice' ah tarlan vek a ni nghe nghe a. Hemi hmang hian Firm te hian an chhang a, a chhang hniam ber pe lovin quintal 1 ah Rs. 3550 a supply turin LZ Juice, Melthum chu sorkar chuan a thlang  fel ta thung a, a chhang hniam zawk nena an inthlauhna hi quintal 1 ah  Rs.149.50 a ni. July 22, 2024 a department in buhfai chhang hniam ber supply tura RL Store a pek loh chhan RTI hmanga zawhna a chhan dan nen a in mil ta lo a ni.

He buhfai tender chungchang hian tunlai Zoram titi a luah hle a, Zoram Today hriat danin, Buhfai tender koh a nih hian tender chhang tute buhfai sample (Grade- A, B, C) en dikna a awm chuang lova, kawng hrang hranga tehin sorkar chuan LZ Juice a thlang chhuak ta a ni. Hetih lai hian social media ah Supply minister B. Lalchhanzova chuan, "RL Store te chhanna rate hi MAMCO in an supply theihlohna rate, an fail pui mek a ni a, sawrkar tan he mi rate hi chuan risk lak ngam chi an ni lo... RL Store hi lo pe ta se, MAMCO fail tawhna tho a ni a, supply leh hlei theilo ta se, mipui phun nasat tur zia chu ..in hrethiam mai ang,'' a ti.