Zoram Today thudawn danin July ni 3 khan Bangladesh atangin Zohnahthlak raltlan mi 33 te chu Damdep II ah an sahimna zawngin an tlan lut a. Hei hi Border Security Force (BSF) sipai te'n lo hmuin an thawn kir leh nghal a. Ramri ah nikhat leh zankhat an tangkhang.

July ni 5 khan mi 93 te chu Damdep II ah vek hian tlan lut lehin Damdep II Community hall ah an dah a, khawtlangin lo tuam hlawmin ei in tur an pe a, hetih lai hian BSF ten an awmna hi tlawh pawh theih lova siam nghalin July ni 6 zing khan Bangladesh- India ramri ah an dahkir leh nghal a ni. Damdep II atanga thudawn danin BSF duty te hi sipai 30 an chuang niin duty an bei ngawrh thin hle.

Damdep II ah hian chenna In 90 vel a awm mek a, Zohnahthlak raltlante dawnsawn chungchangah khawtlang an buai thei hle. Nimina raltlante hi BSF te hian an kutzungpui zia nemkai tirin an hmingte pawh an chhinchhiah niin an sawi.

Mizoram Bawm Students' Association (MBSA) hruaitute atanga thudawn danin, BSF te hian Zohnahthlak raltlan an thawn kir leh te hi ramri ah BSF hian an la awm tir mek niin an sawi a, 'MBSA in  in control thei dawn anih chuan kan rawn dah kir leh thei ang,' tiin MBSA hotute hi an hrilh niin an sawi.

Vawiin khan ZO Re- Unification Organisation (ZORO) chuan thuchhuah siamin, "Kan Unaute sahimna zawnga Zofate Jerusalem Mizoram sutpui rawn bel tute BSF-in nunau an nih pawh pawi sa lova ram hnuaia awm leh tura an thawn kir leh thin hi  Zofate min hmuhsitna ah kan ngai," an ti a. "Mizoram sorkar pawh kan unaute thlavang hauha Zofate Jerusalem Mizoram sutpui rawn bel tute ti beidawng lo turin a ngen a ni," ZORO chuan a ti.

Chief Minister Lalduhoma chuan vawiin khan Prime Minister Narendra Modi a hmu a, Bangladesh atanga Zohnahthlak raltlante chungchang pawh Modi a bulah a sawi lang niin sorkar thuchhuah chuan a tarlang a, Bangladesh atanga himna zawnga Mizoram rawn lut te chu a thawnkir theihloh thu chiang takin Prime Minister hnenah hian a sawi a ni, tiin a tarlang.